Unha experienca única á luz das candeas

Candlelight: Tributo a Queen e Abba

Programa

• Dancing Queen
• SOS
• Money, Money, Money
• Bohemian Rhapsody
• I Want to Break Free
• Waterloo
• Super Trouper
• Mamma Mia
• Don´t Stop Me Now
• We Will Rock You
• We Are the Champions

ROCÍO MÁRQUEZ

MÚSICA · CICLO FIESTRA ABERTA

Rocío Márquez é unha das figuras fundamentais da música flamenca do século XXI. Á hora de posicionarse coma cantaora, toma o testigo de grandes renovadores do xénero. Nas súas tres décadas de carreira artística, aúna rigor investigador, vocación creadora e excelencia interpretativa. O resultado, unha rotunda contribución a que o flamenco esté hoxe situado na vangarda da música actual.

Nesta ocasión, acompañada polo guitarrista Pedro Rojas- Ogayar, presenta HIMNO VERTICAL. O réquiem, tradicionalmente un canto de despedida, unha misa que rende tributo aos mortos, convírtese neste proxecto nunha obra que honra non so o final, senon tamén o comezo, o fluir e a transformación. Este réquiem non segue os dictados da autoría, nin pertence a unha única voz. É un eco coral que resoa desde o colectivo, un ritual de despedida e benvida á vez, unha cerimonia circular que invita a cuestionar o ciclo da vida e a morte como polos opostos e a asumilos coma unha única danza.

Desde Cádiz, La Perra Blanco leva oito anos incendiando escenarios por toda Europa. Liderada por Alba Blanco, guitarrista, cantante e compositora, a banda consolidouse como unha das propostas de rock’n’roll máis potentes e auténticas do momento. Completa o cuarteto Guillermo González ao contrabaixo, Jesús López á batería e Gerard Vercher ao teclado e saxo.

A súa enerxía en directo foi recoñecida pola prensa como “o mellor directo de España”. O seu último traballo, Get It Out (Folc Records, 2024), confirma o seu lugar como unha das grandes promesas do rock and roll europeo. En 2026 espérase o estreo do seu próximo traballo e xira nacional e internacional.

Volve o Festival Jaleo! Tras unha primeira edición que fixo vibrar Santiago de Compostela, Jaleo! regresa con máis forza, máis música e máis ganas de celebrar a chegada da primavera por todo o alto.

Co obxectivo de ofrecer unha alternativa fresca máis aló do verán, Jaleo! transforma un día primaveral nunha experiencia única no corazón da capital galega, unha cidade que late ao ritmo da cultura e da creatividade.

O ano pasado, o cartel reuniu grandes nomes como Viva Suecia, Zahara, Carlos Ares, Sexy Zebras, Dani Dicostas e David Van Bylen DJ, consolidando a Jaleo! como unha cita imprescindible no calendario cultural de Galicia.

Este 11 de abril, o Multiusos Fontes do Sar volverá a ser o epicentro da boa vibra cunha nova edición que promete superar todas as expectativas. Unha mestura explosiva de estilos e sons, con artistas nacionais de primeira liña e talentos emerxentes que están marcando o rumbo da música actual.

Máis que un festival, Jaleo! é unha celebración da cultura, da comunidade e da diversidade. Unha oportunidade para gozar, compartir e deixarse levar pola enerxía dun público que vive a música intensamente.

Unha experienca única á luz das candeas

Programa Candlelight: Tributo a Hans Zimmer

• Time de Origen
• This Land de El rey león
• Zooster’s breakout de Madagascar
• Supermarine de Dunkerque
• Honor de The Pacific
• A Dark Knight de Batman, el caballero oscuro
• Suite de Wonder Woman
• Cornfield Chase de Interstellar
• Suite de Dune
• Suite de Gladiator
• Discombobulate de Sherlock Holmes
• Flight de El hombre de acero

Hamlet é sen lugar a dúbidas a peza teatral máis famosa da historia, escrita arredor do 1600 por un home que pretendeu, como Atlas, coller a esfera da Terra nas súas mans, e con ela todos os asuntos humanos, e plantalos no seu pequeno teatro do sur de Londres, The Globe. Desde ese lugar o teatro pasaría a ser un espello no que a humanidade puido observarse dun xeito critico a través de pezas que son obras mestras inesgotables de pura paixón e acción escénica.

Ficha artística

• Texto original: William Shakespeare
• Dramaturxia: Vanesa Sotelo e Tito Asorey
• Dirección: Tito Asorey
• Elenco: Sergio Abelaira, Cristina Andrade, Belén Constenla, Raquel Espada, Isabel Garrido, César Goldi, Alejandro Jato, Marita Martínez, Iolanda Muíños, Anxo Outumuro, Pedro Placer, Adrián Ríos, Machi Salgado, Toni Salgado, Inés Salva.
• Escenografía: Carlos Alonso.
•  Iluminación: Laura Iturralde. 
• Vestiario: Saturna. 
• Música: Xavier Bértolo. 
• Maquillaxe e caracterización Lorena Calvo. Coreografía Rut Balbís. 
• Loita escénica Xosé Piñeiro. 
• Asistencia de texto Melania Cruz. 
• Asesoramento lingüístico:Rosa Moledo. 
• Axudante de dirección: Sara Rey

Galiverso regresa á Cidade da Cultura de Galicia cunha proposta inmersiva que permite explorar virtualmente o patrimonio cultural e natural de Galicia. A través da realidade virtual, o público poderá percorrer espazos como o antigo Portomarín antes da construción do encoro de Belesar, ou visitar lugares de gran valor como a cova de Eirós, a praia de Teixidelo, o Canón do Sil ou a cripta do Apóstolo na Catedral de Santiago.

A experiencia inclúe diferentes contidos desenvolvidos dentro desta iniciativa, que combinan innovación tecnolóxica e divulgación patrimonial, permitindo viaxar tamén polos fondos mariños da costa galega ou polos centros da Rede de Museos de Galicia.

Acceso: De balde con reserva previa (Ataquilla ou no propio museo)
Horario: Martes a venres, de 16:00 a 20:00 h; fins de semana e festivos, de 11:00 a 14:00 h e de 16:00 a 20:00 h
Idade recomendada: A partir de 8 anos (menores de 12 acompañados)

Travesía Unicornio chega á Biblioteca de Galicia co gallo do Día do Libro Infantil e Xuvenil, da man de Teatro Ghazafellos.

A obra, adaptación teatral de Pepablo Patinho do libro de María Canosa, gañador da primeira edición do Premio Anisia Miranda de teatro infantil e publicado por Edicións Embora en marzo de 2023, conta a historia dun neno e o seu unicornio que se atopan cunha xenio que lles promete cumprir os seus desexos. Para conseguilo, deberán escoitarse, aceptarse e respectar tamén os desexos dos demais.

Un espectáculo cheo de humor que cuestiona os roles tradicionais de xénero e abre a porta a que nenas e nenos elixan libremente os seus gustos.

Contacontos da man de Bea Iglesias. Un peto é un lugar ideal para gardar de todo: unha pedra bonita do camiño, un papel cun debuxo, unha chave que abre portas coñecidas ou unha canica que brilla ao sol. Ás veces tamén gardan silencios, pensamentos pequenos ou segredos que non queremos que se perdan polo vento. Co paso do tempo, todas esas cousas comezan a falar entre elas e, sen decatarnos, dentro do peto nacen historias que medran ata converterse en contos. Unha proposta chea de imaxinación para escoitar, sentir e deixarse levar. No salón de actos. Para nenas e nenos de 3 a 8 anos. Entrada libre ata completar capacidade.

O Outlet Área Central convértese este sábado 11 de abril nun gran punto de encontro para a creatividade coa celebración do “Mercado da arte”, un evento que reunirá a máis de 80 artistas e creadoras/es de toda Galicia e doutros puntos do panorama nacional.

Ao longo de toda a xornada, de 11:00 a 20:30 horas, a esquina amarela de Área Central acollerá unha proposta cultural e comercial diferente, apostando polo talento emerxente e pola artesanía contemporánea nun espazo pensado para o lecer e as compras. Organizado por No todo el pescado está vendido, o Mercado da Arte transformará o outlet nun percorrido creativo onde descubrir e adquirir pezas únicas de ilustración, pintura, cerámica, ourivaría e téxtil. Ademais, haberá programación para todos os públicos: música en directo con Paco Nogueiras ás 12:30 h, a presentación do libro Las amigas del espejo de Alejandro López ás 16:30 h, e a actuación de Modulador das Ondas ás 18:00 h.

Evento organizado por No todo el pescado está vendido, que reunirá nos nosos corredores a 80 artistas procedentes da xeografía galega e nacional. Haberá ilustración, pintura, cerámica, ourivería e zona textil, como unha forma de dar visibilidade aos traballos artísticos e artesanais da nosa contorna. A xornada inclúe programación complementaria, con música en directo de Paco Nogueiras, a presentación do libro Las amigas del espejo de Alejandro López e actuación musical do Modulador de Ondas co seu Theremin. Tamén se ofrecerán diversos talleres ao longo de toda a xornada, nos que será posible experimentar cos artistas alí presentes. O Mercado da Arte está pensado para o disfrute de todos os públicos, para dar a coñecer os artistas e a artesanía emerxente e contemporánea, fomentar a economía circular e, sobre todo, para poder mercar pezas que conteñen unha historia e moita dedicación.

A Semana Santa Compostelá sempre tivo sempre un encanto especial, e unha contorna monumental Patrimonio da Humanidade. A conmemoración da Paixón, morte e resurrección de Cristo, de profundo significado para a fe cristiá, atopa nesta cidade magníficos escenarios que dotan ás tradicionais procesións dunha solemnidade particular.   

As once confrarías compostelás, versión relixiosa dos antigos gremios, organizan os seus pasos segundo antigas disposicións, portando pesadas e fermosas tallas da Virxe, de Cristo ou dos apóstolos, algunhas moi antigas e moi veneradas polos composteláns. Crentes e non crentes marabíllanse ao seu paso silencioso, acompañado só polo son ferinte das cornetas e polo ritmo grave dos tambores. O carácter dramático dos pasos procesionais acentúase aínda máis coa tradicional vestimenta dos confrades, ou coas súas penitencias, como a de camiñar descalzo ou axeonllado.

Programa de procesións:

27 de marzo. Venres de Paixón 

21:00 h. Igrexa de San Miguel dos Agros. 
Procesión da Virxe das Dores

28 de marzo. Sábado de Paixón 

12:00h Igrexa de San Xoán Evanxelista
Traslado da Humildade

20:15h. Saía da Catedral de Santiago de Compostela
Exercicio do Santo Vía Crucis

29 de marzo. Domingo de Ramos 

10:45 h. Igrexa da Terceira Orde Franciscana Secular 
Procesión da "Borriquita"

18:00 h. Igrexa das Ánimas. 
Procesión da Esperanza 

31 de marzo. Martes Santo 

21:00 h. Igrexa das Mercedarias
Procesión do Santísimo Cristo da Paciencia

22:00 h. Igrexa de San Francisco.
Procesión da Oración no Horto das Oliveiras e Prendemento 

1 de abril. Miércoles Santo 

21:30h. Igrexa de Santa María do Camiño
Procesión da Humildade

2 de abril. Xoves Santo 

19:30 h.  Igrexa de San Francisco. 
Procesión da Última Cea do Salvador

23:30 h. Igrexa de Santo Agostiño
Procesión do Flaxelado

3 de abril. Venres Santo 

11:00 h. Praza da Quintana.  
Sermón e Procesión do Santo Encontro

18:00 h. Capela da Angustia. 
Procesión da Quinta Angustia

20:00 h. San Domingos de Bonaval.
Procesión do Santo Enterro

23:00 h. Igrexa de Santa María Salomé. 
Procesión da Soidade

4 de abril. Sábado Santo 

20:00 h. Colexio da Inmaculada
Procesión do Santístimo Cristo da Unciçon e Nosa Señora da Serenidade

5 de abril. Domingo de Resurreción 

10:30 h. Igrexa de San Francisco. 
Procesión do Cristo Resucitado

12 de abril. Dominica in Albis 

11:00 h. Catedral de Santiago de Compostela
Traslado do Santísimo Cristo da Paciencia

+ INFO

Visitas recomendadas:

https://www.santiagoturismo.com/axenda-cultural/semana-santa-2026-visitas-recomendadas

 De Lugares e Órganos: https://www.santiagoturismo.com/axenda-cultural/de-lugares-e-rganos-2026

Xunta de Confrarías:
http://www.semanasantasantiago.es/

Esta mostra supón un percorrido expositivo polas diferentes etapas artísticas e vitais de Eugenio Granell dende a súa vinculación con Galicia como referente de moitas das súas producións ao longo de toda a súa vida, neste senso faise unha alusión especial á obra do seu irmán, Mario Granell.

Nestes 30 anos, a Fundación Granell pasou por diferentes etapas, sempre baixo unha única traxectoria: protexer, difundir e estudar o legado de Granell e do Surrealismo, dende diferentes ópticas e dando a oportunidade a moitos artistas de amosar o seu traballo ademais de  facer participe aos diferentes públicos dende o local ao internacional.

A exposición Boutique Amparo, comisariada por Eduardo Valiña forma parte das mostras conmemorativas do trinta aniversario do museo.      

O Museo do Pobo Galego acolle a exposición temporal das esculturas do Mestre Mateo —Abraham/Xeremías e Isaac/Ezequiel— recuperadas polo Concello de Santiago logo de seren espoliadas polo franquismo. A mostra, situada na Ala Sur do museo, inclúe unha liña do tempo e un audiovisual do proxecto KosmoTech_1200, centrado na reconstrución do coro do Mestre Mateo e do nártice do Pórtico da Gloria. Todo o contido é accesible grazas á colaboración coa Federación Autismo Galicia, que facilitou materiais de accesibilidade cognitiva mediante pictogramas e textos en linguaxe clara.

A Fundación DIDAC presenta O Arquivo de Barro, unha exposición baseada no arquivo do deseñador galego Pepe Barro, depositado na Fundación desde 2024. A mostra permite coñecer a súa traxectoria desde os anos setenta ata hoxe, destacando proxectos de deseño editorial e identidade visual, así como a súa labor como cronista da historia de Galicia. Durante a exposición haberá relatorios e conversas, comezando o 22 de xaneiro con Suso de Toro. O proxecto conta coa colaboración do Ministerio de Cultura, a Deputación da Coruña e o Concello de Santiago.

Unha exposición que convida a descubrir o valor simbólico, artístico e social da máscara a través de pezas procedentes de máis de 40 países reunidas polo coleccionista e viaxeiro Nacho Rovira, combinadas con máscaras galegas, algunhas pertencentes ao Museo do Pobo Galego.

A mostra estará aberta ata abril de 2026 e forma parte dun proxecto de investigación e divulgación da Universidade de Valladolid a través da Cátedra de Estudos sobre a Tradición, inscrita no proxecto europeo Unveiling the Arts and Works behind the Masks, promovido pola European Education and Culture Executive Agency.

O CGAC, que é o primeiro museo proxectado por Álvaro Siza Vieira, abordou a arquitectura desde múltiples perspectivas no seu programa de actividades e exposicións, a miúdo a través da mirada dos e das artistas que colaboraron co centro desde a súa apertura en 1993.

É, polo tanto, un lugar propicio para acoller a primeira itinerancia de Internalities, a exposición comisariada e deseñada polos arquitectos galegos Manuel Bouzas e Roi Salgueiro para o Pavillón de España na 19.a Bienal de Arquitectura de Venecia, que tivo lugar do 10 de maio ao 23 de novembro de 2025. Esta itinerancia constitúe, ademais, a primeira ocasión na que unha exposición concibida para representar a España nesta exposición internacional de arquitectura se presenta nun espazo museístico fóra do certame.

Internalities foi o proxecto seleccionado mediante convocatoria aberta para representar a España na última edición da bienal, comisariada por Carlo Ratti e articulada baixo o lema Intelligens. Natural. Artificial. Collective. Coa súa proposta, este arquitecto e urbanista italiano quixo explorar como as distintas formas de intelixencia —natural, artificial e colectiva— poden adaptarse para combater a crise climática e contribuír así a construír un mundo máis sostible.

A exposición no CGAC articúlase arredor dunha sala introdutoria, Balance, que reúne dezaseis proxectos a través dos cales se evidencia a diversidade de enfoques que actualmente se están desenvolvendo en España para conciliar ecoloxía e economía. A partir de aí, despréganse cinco eixes temáticos —materiais, enerxía, oficios, residuos e emisións—, que amosan os resultados das investigacións realizadas por varios equipos de arquitectos e fotógrafos locais, cada un deles centrado nun territorio e nun recurso concreto da xeografía española, co obxectivo de analizar a descarbonización da arquitectura no país.

A montaxe emprega, como elementos construtivos, os materiais protagonistas das distintas seccións, outorgándolle un protagonismo especial á madeira procedente dos montes veciñais en man común de Galicia.

Promovida polo Goberno de España, a través da Secretaría Xeral de Axenda Urbana, Vivenda e Arquitectura do Ministerio de Vivenda e Axenda Urbana (MIVAU), e desenvolvida en colaboración con Acción Cultural Española (AC/E) e a Axencia Española de Cooperación Internacional para o Desenvolvemento (AECID), Internalities contou, ademais, co patrocinio oficial de FINSA.

As estacións do ano é unha exposición de arte contemporánea singular que convida a abrir os sentidos, camiñar devagar e mergullarse en cada obra. Partindo dun concepto de inmersión espacial, o Museo Centro Gaiás convértese nun lugar onde sentir a arte a través dos sons, da temperatura, das cores e das texturas, coa primavera, o verán, o outono e o inverno como os grandes escenarios das nosas vidas.

A comisaria da mostra, a artista e investigadora, Mónica Alonso, seleccionou coidadosamente cada pintura, escultura, fotografía, instalación e vídeo, deseñando un percorrido que pon o foco no valor emocional, sensorial e simbólico da experiencia artística.

Nesta viaxe percorreremos paisaxes, bodegóns, esculturas e imaxes indiscutiblemente evocadoras da memoria individual e colectiva de cada estación en Galicia. A choiva e a neve, o mar, o verde das montañas, as flores ou plantas e froitos como o millo, as verzas ou a pataca xorden non só como motivos estéticos, senón como compoñentes fundamentais da vida e da identidade galega.

Do Movemento Rexionalista de principios do século XX ata as xeracións máis novas que están a gañar recoñecemento a nivel estatal e internacional, As estacións do ano reúne máis de 80 pezas de 63 artistas, procedentes das coleccións de arte públicas e privadas máis destacadas de Galicia. Entre elas, a Colección de Arte Afundación, a Colección de Arte ABANCA, as fundacións María José Jove, Luis Seoane e Eugenio Granell, así como o Centro Galego de Arte Contemporánea, os museos de Belas Artes da Coruña, Pontevedra e Lugo, ou as galerías Nordés e Trinta.

Lluís Hortalà (Olot, Xirona, 1959) xoga co engano e a confusión da mirada, mergullándose na arte do trompe l’oeil. Centrándose coidadosamente no detalle, incide nunha pintura realista ata o extremo, que é mimética coas texturas e os brillos, capaz de reproducir visualmente o tacto e, ás veces, a temperatura fría das pedras. Nesta pintura parece que non hai nada máis ca técnica; iso si, impecable. Non obstante, por detrás da técnica afloran o sentido e os significados. En cada unha das obras hai unha narrativa, unha rede de conexións que constrúe un marco reflexivo sobre a historia; tamén, e sobre todo, a historia da pintura e da cultura.

A súa obra de principios dos 2000 caracterizouse por estudar a paisaxe que frecuentaba como alpinista e montañeiro. A paisaxe era a montaña, as formas dos pináculos, pero sobre todo a rocha, a textura da pedra, a rugosidade caprichosa, xeolóxica e mineral. Esta atención á pel das rochas, á súa textura, é un precedente de todo o que virá despois: a representación dunha ornamentación arquitectónica e de estilos que encadran ideoloxías e políticas, formas de xulgar.

Co título da exposición, Ante a Lei —que tamén lle dá nome a varias das súas obras—, Lluís Hortalà remítenos a un dos contos máis coñecidos de Kafka, quizais o máis divulgado xunto con A metamorfose (tamén chamada A transformación en traducións recentes). Con esta referencia, Hortalà convídanos a explorar a tensión entre o acceso e a barreira, entre o visible e o prohibido, temas que atravesan o universo kafkiano e resoan na súa obra plástica.

A mostra inclúe algunhas das súas series máis recentes, que desenvolven progresivamente xuízos sobre as leis cambiantes do gusto. Comeza co contraste entre chemineas rococó e neoclásicas, que precederon e anunciaron formalmente a guillotina: unha forma de xulgar a vida ou a morte desde a lei durante a Revolución Francesa. Continúa coas paredes —pintadas ou revestidas con teas— e as portas que conectan as salas de grandes museos europeos, como o Prado de Madrid ou a National Gallery de Londres. Todos eles se converteron en tribunais desde os que xulgar non só a arte, senón tamén as nacións que os crearon.

Por último, chegamos á porta e ás ventás da sala do tribunal onde tiveron lugar os xuízos de Núremberg, que sentaron as bases do mundo democrático posterior a 1945, no que vivimos ata os nosos días. Naquel proceso xulgáronse os crimes do nazismo e asinouse a necesidade de leis lexítimas, fronte a cuxa ausencia axexan os demos cos que nos tocou convivir: os mesmos que hoxe rexorden, reivindicando liderados totalitarios e enarborando a bandeira do capricho autoritario e do odio. Lembrar serve para loitar e resistir. Kafka entre nós é unha luz que advirte das tebras que nos ameazan.

Este proxecto site specific “descende o ceo” simbólicamente, levando o debuxo e a pintura sobre papel ao espazo, nun xogo de sensacións entre o corpo, a pintura e a arquitectura.

O ceo tórnase vulnerabilidade, pel e memoria, mesmo corpo, case como se descendesen séculos de historia dese rico teito mudéxar volvéndose febras de paisaxe. Nesta obra da artista arxentina Luciana Rago, os papeis de febras vexetais son traballados con tinta e acuarela, nun interesante xogo visual na súa fascinación polo ambiguo, desdebuxando o anverso e o reverso, investigando múltiples posibilidades nunha sorte de tensión entre o leve, o etéreo e o denso, o permanente. A obra propónse así como unha experiencia vital para ser transitada: unha escenografía envolvente que ofrece diferentes puntos de vista e interpela activamente a quen a percorre.

“O ceo aos meus pés”, que toma o título dunha antoloxía de poesía chinesa contemporánea, é unha metáfora complexa, mais tamén sensorial: un ceo que se deconstrúe en luz, levidade e emoción, mentres a súa derme actúa como rexistro de memoria, pegada e resistencia. A artista dialoga, así, coa tradición pictórica oriental, mais o trazo e a mancha irrompen agora na tridimensionalidade para interpelar o corpo e a súa temporalidade imperativa.

A exposición Mar de San Simón reúne unha selección de pinturas de Berta Cáccamo (Vigo, 1963–2018), realizadas principalmente entre finais dos anos oitenta e comezos dos noventa. A mostra revisa un momento clave da súa traxectoria, no que a artista evoluciona desde unha pintura máis xestual cara a unha linguaxe depurada baseada na arquitectura e a composición. Inclúe obras significativas como Triple percorrido (1989) e o políptico Descrición do día (1988–1990), xunto con papeis e pinturas realizadas durante a súa etapa en París. O conxunto propón unha mirada sobre a transcendencia da súa obra e sobre a necesidade de revisar o pasado para pensar o presente.

A exposición ATENCIÓN PLENA do artista Félix Fernández, comisariada por Eduardo Valiña, poderá visitarse na Fundación Eugenio Granell ata o 17 de maio. Esta mostra interdisciplinar combina vídeo, performance, fotografía e debuxo para reflexionar sobre a identidade e a existencia. Inclúe dúas obras inéditas: Nos límites da corporalidade, que aborda a relación entre corpo e identidade nun contexto social dixitalizado, e Impermanencia, que explora a identidade líquida e a pertenza social mediante fotografía, animación 3D e referencias culturais. A exposición complétase con debuxos e fotografías que amplían o seu contido.

O venres 13 de marzo ás 19:30 h inaugúrase a exposición “Voluntades simultáneas” dos artistas ferroláns Sofía Piñeiro e Xabier Cano no Hotel Virxe da Cerca en Santiago de Compostela. A mostra enmárcase dentro do convenio expositivo desde 2011 entre Pousadas de Compostela e a coordinadora de exposicións Cristina Carballedo Penelas, que permite que artistas profesionais intervistan con obras contemporáneas nos nobles espazos do edificio do século XVIII.

Sofía Piñeiro (Ferrol, 1981) é licenciada en Belas Artes pola Universidade de Castilla-La Mancha e profesora de debuxo e pintura. O seu universo plástico mestura a revisión da poética do paisaxe e escenas costumbristas con trazos sarcásticos e infantís, utilizando cores vibrantes e escenarios que combinan fantasía e reflexión sobre a percepción da realidade.

Xabier Cano (Ferrol, 1984) é ilustrador freelance, pintor e arquitecto de interiores. Formouse en distintas técnicas pictóricas e, desde 2021, dedícase integramente á creación artística, fanzines e publicacións ilustradas. Ambos os artistas participaron recentemente en exposicións como “Neoterritorios” no Museo da Construcción Naval de Ferrol e estarán neste mesmo espazo este verán nunha mostra colectiva sobre o Camiño de Santiago e o eclipse de sol.

A Galería José Lorenzo inaugura a exposición Abstracción Atlántica, dedicada á arte abstracta galega das últimas décadas do século XX. A mostra reúne unha decena de obras de artistas como Xosé María Molezún, Silverio Rivas Caruncho, Antón Lamazares, Antón Goyanes ou Rafael Baixeras, vinculados a linguaxes sintéticas e expresivas que exploran o espazo, a materialidade e a memoria. A exposición poderá visitarse a partir do martes 17 de marzo.

A Cátedra Juana de Vega inaugura ‘Mulleres e comercio na Galicia, séculos XIX e XX’, unha exposición que reivindica o legado das mulleres como motor económico e social. O proxecto rescata a memoria das mulleres que, durante xeracións, sostiveron o abastecemento e o pulso económico das vilas e cidades galegas.

Ofrece unha ampla visión do papel feminino no comercio tradicional a través de paneis, fotografías históricas, documentos de arquivo, materiais sonoros e referencias literarias. O percorrido integra o traballo das vendedoras que aseguraban cada día o abastecemento urbano desde os mercados de abastos e prazas públicas; o dinamismo das vendedoras ambulantes e dos postos fixos que configuraron a paisaxe comercial das rúas; a vitalidade das feiras como grandes espazos de intercambio económico, socialización e tradición; e o avance das mulleres como titulares de negocios urbanos —desde mercerías e quincallerías ata sombrererías, bazares ou establecementos de distribución máis complexos— nun contexto no que o seu labor quedou con frecuencia invisibilizado.

Este diálogo entre pasado e presente complétase cunha mirada contemporánea ao comercio feminino, destacando a continuidade de negocios hoxe emblemáticos rexentados por mulleres que manteñen vivo un modelo baseado na proximidade, no coidado polo produto e nun tecido social que reforza a identidade das cidades e vilas galegas.

O Consorcio de Santiago organiza a exposición “A alma de Compostela: un percorrido en acuarela e fotografía” na Casa do Cabido (Praza de Praterías), que poderá visitarse de balde. 

A mostra forma parte do Proxecto Compostela, unha investigación visual do colectivo LUCET na que a práctica artística actúa como ferramenta de análise do territorio, da memoria e da experiencia urbana. Mediante a acuarela e a fotografía, os artistas ofrecen unha lectura da cidade como paisaxe cultural construída ao longo do tempo a partir da interacción entre espazo, historia e persoas.

A nova exposición no Auditorio de Galicia recupera o traballo fotográfico de Colita (Isabel Esteva, 1940-2023, Barcelona) publicado xunto con textos da escritora Maria Aurèlia Capmany (1918-1991, Barcelona) no libro Antifémina (1977), considerado o primeiro libro gráfico abertamente feminista da Transición.

A mostra reúne máis de 130 fotografías organizadas en dez seccións que exploran, con enfoque crítico e didáctico, a feminidade convencional e a vida das mulleres baixo o franquismo, abordando temas como traballo, relixión, marxinación, envelenamento e sexualidade, así como a experiencia de corpos empoderados, decorativos ou erosionados polo tempo.

Esta é a primeira vez que o libro se exhibe en formato expositivo, homenaxeando a Colita e reivindicando o papel destas dúas mulleres intelectuais. A exposición é unha coprodución de La Fábrica e o Círculo de Bellas Artes de Madrid e foi comisariada por Francesc Polop, quen recuperou e redeseñou o libro.

O Arquivo de Galicia inaugura a exposición Mulleres sobranceiras. Luísa Villalta. Música, palabra e compromiso, grazas á recente doazón do arquivo persoal da autora por parte da súa familia. Esta doazón converte ao Arquivo nunha das institucións de referencia para o estudo da figura de Luísa Villalta e permite achegar ao público a vida e obra dunha das intelectuais máis brillantes da súa xeración.

A mostra reúne máis de 60 pezas entre as que se atopan apuntes e borradores da súa obra, correspondencia con escritores e escritoras, así como folletos e programas de actos nos que participou. O percorrido expositivo permite descubrir as diferentes facetas dunha muller que destacou como música, escritora, tradutora e docente, e que practicou múltiples xéneros literarios: poesía, teatro, ensaio e xornalismo de opinión. En todas elas emerxe sempre a súa paixón, o seu compromiso e a súa mirada crítica e sensible.

Ademais, complétase coa exposición de algunhas das súas publicacións, procedentes da súa biblioteca persoal e do fondo da Biblioteca de Galicia, ofrecendo unha visión máis completa do seu legado intelectual e cultural.

A mostra está comisariada polos técnicos do Arquivo de Galicia Miguel López Sánchez e María del Mar García Miraz, e forma parte da iniciativa que desde 2016 o Arquivo desenvolve con motivo do Día Internacional da Muller: inauguracións de exposicións temporais que poñen en valor o papel das mulleres ao longo da historia.

Esta exposición é unha oportunidade única para mergullarse na vida, obra e compromiso de Luísa Villalta, e para recoñecer a importancia do seu legado na cultura galega e no pensamento contemporáneo

A exposición A natureza das cousas reúne unha selección de fotografías de Chema Madoz realizadas entre 1982 e a actualidade, nas que o artista dialoga coa natureza ou emprega elementos naturais. Madoz (Madrid, 1958), un dos creadores máis destacados da fotografía española contemporánea, é coñecido polas súas imaxes en branco e negro de inspiración surrealista. Comisariada por Oliva María Rubio e coorganizada con La Fábrica, a mostra inaugúrase o 26 de marzo na Sede Afundación de Santiago de Compostela e poderá visitarse ata o 29 de agosto.

Esta mostra acolle por primeira vez na galería a Alba Troiteiro, unha artista emerxente que encarna un espírito circense —vinculada co Circo Nove— enerxético e á vez fráxil, esencia que define toda a súa obra.

Alba Troiteiro (Soutomaior, 1988) traballa desde a linguaxe plástica, destacando o debuxo e a liña como forma de pensamento e expresión visual. A súa creación desenvolveuse en múltiples formatos —papel, muro, pel— sempre cunha mirada posta na emoción e na sensibilidade, sen perder a forza e a estrutura gráfica que a caracterizan. Na súa obra conflúen o íntimo e o simbólico, o corpo e o espazo, o artesanal e o contemporáneo. O xogo, o rito e a emoción convértense en linguaxes que se canalizan a través do trazo e da composición.

Actividade organizada en colaboración coa asociación PlaymoGalicia na que se exporán dioramas orixinais realizados con pezas desa marca de xoguete e que recrean diferentes escenarios e ambientes. Haberá catro dioramas: dous de 4 metros cadrados, un de 8 metros cadrados e un de 12 metros cadrados. Ademais, os días 18 e 19 de abril haberá unha feira comercial na que participarán varios expositores con produtos da marca Playmobil e un concurso de minidioramas.

A Facultade de Filoloxía acolle a exposición A bordo, de Nuno Correia. A mostra toma como punto de partida o libro Lisboa – Libro de bordo, de José Cardoso Pires, para construír unha proposta de marcado carácter cinematográfico, íntima e reflexiva.

Sen afastarse do texto orixinal, o artista desenvolve un guión propio, afastándose dunha interpretación meramente ilustrativa para ofrecer unha visión persoal da cidade. Máis que unha ruta, a obra inspírase nun relato que percorre os espazos de memoria do escritor e o seu universo literario.

Comisariada por Carlos Carvalho, a mostra poderá visitarse ata o 31 de maio no segundo andar do centro.

A Galería LUISA PITA inaugura o próximo 9 de abril a exposición Aventura da mirada de Antón Patiño, que reúne 17 pinturas sobre tela realizadas entre 2023 e 2026. A mostra ofrece unha visión actual do seu traballo, no que continúa a súa investigación arredor do xesto, a materia e a construcción do espazo pictórico.

O título da exposición suxire un percorrido aberto en torno á percepción, onde a mirada non só observa, senón que se despraza, constrúe e activa o sentido da pintura.

Neste conxunto de obras, a pintura preséntase como un campo activo no que conviven enerxía xestual e estrutura. As teas articulan composicións dinámicas nas que a cor, lonxe dunha función meramente descritiva, actúa como elemento xerador de ritmo e espazo. A obra de Patiño sitúase así nun territorio onde o orgánico e o constructivo se relacionan en constante tensión.

A exposición inaugúrase nun momento especialmente relevante, coincidindo practicamente coa clausura da súa recente mostra Auga e Soño no Palexco (A Coruña), o que permite establecer un diálogo entre ambos proxectos e reforzar a visibilidade da súa produción máis recente.

A Real Filharmonía de Galicia afronta a súa temporada 2025-2026, que leva por título ‘Historias’. Coincidindo coa celebración do seu 30 aniversario, a programación aposta polo talento galego, a creación contemporánea e pola proxección da orquestra cara ao futuro.

+INFO

Dar a coñecer a música de vangarda dos séculos XX e XXI, fomentar a creación de novas composicións e pór a dialogar a innovación sonora coa doutras artes son os obxectivos de Contemporáneas, un novo programa do Concello de Santiago co apoio da Deputación da Coruña. A primeira edición de Contemporáneas ofrecerá de outubro a maio oito concertos, un cada mes, que incluirán cinco estreas absolutas e tres composicións especificamente creadas para a ocasión.

+INFO

Compostela Cultura presenta a súa temporada escénica para o primeiro semestre de 2026, unha programación que combina memoria, identidade e novas creacións a través de 23 espectáculos e 33 funcións. A oferta estrutúrase en tres focos —Castelao en escena, Escenas do presente e NeoTrad— e complétase coa axenda familiar da Tropa C. As representacións desenvolveranse no Teatro Principal, o Auditorio de Galicia e a Casa das Máquinas, con entradas dispoñibles desde o 5 de decembro.